दशैंपछि ‘छ माया छपक्कै’ पहिलो गीत सार्वजनिक

फिल्म ‘छ माया छपक्कै’को प्रदर्शन मितिसँगै पहिलो गीत सार्वजनिक भएको छ । फिल्म असोजको २४ गतेबाट प्रदर्शनमा आउने छ । फिल्ममा समावेश ‘जुनको जुनेली’ बोलको गीत सार्वजनिक भएको हो । बसन्त थापा र मिना निरौलाको स्वर,  बसन्त थापाको संगीत र राजेन्द्र थापाको शब्द रहेको गीतमा फिल्मका मुख्य कलाकारहरुलाई देख्न सकिन्छ । गीतमा कलाकारहरु दिपकराज गिरी, केदार घिमिरे, जितु नेपाल, केकी अधिकारी, वुद्दि तामाङ लगायतका कलाकारको नृत्य रहेको छ ।

आमा सरस्वती मुभिज र रोहित अधिकारी फिल्मस्को संयुक्त ब्यानरमा निर्माण भएको फिल्म ‘छ माया छपक्कै’ का निर्माता रोहित अधिकारी रहेका छन् । फिल्म दिपेन्द्र लामाले निर्देशन गर्दैछन् भने छायांकन हरी हुमागाईंको छ । फिल्मका लागि कलाकार केकी अधिकारी, दिपकराज गिरी, दीपा श्री निरौला, जितु नेपाल, केदार घिमिरे, सुपुष्पा भट्ट लगायत छन् । फिल्ममा केकी र दिपक पहिलो पटक जोडीको रुपमा देखिदैछन् । फिल्मले करिब ४० वर्ष उमेर अन्तर रहेको जोडीको कथा भन्ने छ । फिल्ममा दिपाश्री निरौला सल्लाहकार निर्देशकको रुपमा रहेकी छन् ।