‘पुर्वाञ्चल साङ्गितिक टुर’मा पुष्पन प्रधान

टुवोर्गको आयोजनामा गायक पुष्पन प्रधानको पुर्वाञ्चल साङ्गितिक टुर भदौ १२ गते शुक्रवारबाट सुरु भएको छ । शुक्रवार झापाको दमकबाट सुरु भएको साङ्गितिक टुर भदौ १९ गते सम्म पुर्वाञ्चलका विभिन्न ठाउँमा आयोजना हुनेछ । दमकसंगै १३ गते मोरंगको पथरी, १४ गते सुनसरीको ईटहरी, १५ गते झापाकै विर्तामोड, १८ गते ईलाम र १९ गते झापाको काकडभिट्टामा आयोजना हुने उक्त साङ्गितिक टुरमा पुष्पनलाई विकल्प व्याण्डले साथ दिनेछ ।

यी बाहेक अन्य स्थानमा पनि कार्यक्रम हुने पुष्पनले बताएका छन् । देश तथा विदेशमा विभिन्न साङ्गितिक टुर गरिसकेका पुष्पनको नेपालमा पुर्वाञ्चल टुर हुन लागेको हो । केही समय अगाडी चर्चित साङ्गितिक रियालिटी शो नेपाल आइडलमा उनले गाएको गीत ‘पंछी’ निकै चर्चित बनेको थियो । दर्जनौँ हिट गीत नेपाली संगीत क्षेत्रलाई दिइसकेका गायक पुष्पनको आगामी साङ्गितिक टुर अमेरिका, यूएई लगायतका देशमा हुनेछ ।