‘मिस्टर नेपाली’ मा दोहोरो भूमिकामा भुवन : गीत सार्वजनिक

फिल्म ‘मिस्टर नेपाली’टिमले एक कार्यक्रम गर्दै प्रदर्शन मिति र गीत सार्वजनिक गरेको छ । फिल्म कात्तिक २९ गतेबाट प्रदर्शनमा आउने छ । कार्यक्रममा ‘नाँचौ छम्मा छम्मा’ बोलको गीतको भिडियो पनि सार्वजनिक गरिएको हो । गीतमा मिलन लामा र रीता केसीको स्वर, सुभाष भुषालको संगीत र देव भुषालको शब्द छ । सार्वजनिक गीतमा फिल्मका मुख्य कलाकारहरु नायक भूवन केसी, नायिका रीमा विश्वकर्मा, नव–कलाकारद्धय साहिल श्रेष्ठ र कुसुम राउत, कलाकाहरु रवि डंगोल, बिष्णु सापकोटा, कमलमणी नेपाल लगायतलाई  देख्न सकिन्छ ।

‘मिस्टर नेपाल’लाई देवचुली फिल्मस्को ब्यानरमा प्रेमराज  दाहालले  निर्माण गरेका हुन् । गीतमा कविराज गहतराजको कोरियोग्राफी छ । फिल्मको बिषयमा नायक भूवन केसीले भने–‘यसमा मेरो दोहोरो भूमिका छ । साथै, फिल्मको कथावस्तु पनि निकै मन परेकाले काम गरेको हुँ ।’ निर्देशक देव भुषालले फिल्मले राष्ट्रियताको अर्थ पहिरनले नझल्काउने सन्देश फिल्मले दिने बताए । भुषालकै लेखन तथा पटकथा रहेको चलचित्रमा निरज कँडेलको छायांकन छ ।