‘हिमालय रोडिज’मा थपिए अनुप र समन : अडिसन भदौ २८बाट

रियालिटी शो ‘हिमालय रोडिज’ को तेस्रो संस्करणको अफिसियल अनाउन्स्मेन्ट यहि शुक्रबार भएको छ  । सिजन ३को अफिसियल घोषणासंगै चर्चित अभिनेता अनुप विक्रम शाही र पहिलो सिजनका विजेता समन श्रेष्ठ टिममा अनुबन्धित भएको निर्माण टिमले सार्वजनिक गरेको छ  ।

पहिलो र दोस्रो सिजनमा तीन जना जज थिए । तर, यस सिजनमा भने चार जना टिम लिडर रहेका छन् । पहिलो र दोस्रो सिजनमा जज बनेका रेमनदाश श्रेष्ठ यस सिजनमा होस्ट बन्नेछन् । ग्याङ लिडरमा भने दुई सिजनका जज आशिस राना ‘लाउरे’ र दीया मास्के रहेका छन् । ग्याङ लिडरमा पहिलो सिजनका विजेता समन श्रेष्ठ र नायक अनुपविक्रम शाही थपिएका छन् ।

सिजन ३ मा नयाँ चुनौती, नयाँ ढाँचा, नयाँ अनुहार एवं नयाँ शैलीको खेल हुने निर्देशक अमनप्रताप अधिकारीले बताए । कार्यक्रममा बोल्दै उनले भने, ‘पहिलो र दोस्रो सिजनले हामीलाई धेरै सिकाएको छ । अब भने हामीले सेलिब्रेटी ग्याङ लिडरको नयाँ ढाँचामा तेस्रो सिजन निर्माण गर्दैछौँ । प्रतिष्पर्धीमात्र नभएर ग्याङ लिडर पनि चूतौतीपूर्ण रुपमा खेलमा सहभागी हुनेछन् ।’

भदौ २८ गते धरानबाट यस बर्षका लागि अडिसन सुरु हुनेछ । भदौ ३१ गते चितवन, असोज ३ गते नेपालगञ्ज, असोज ६ गते पोखरा र असोज ९ गते काठमाडौंमा अडिसन हुनेछ ।