कभर डान्स कम्पिटिसन सहित ‘कबड्डी कबड्डी कबड्डी’ को गीत सार्वजनिक

फिल्म ‘कबड्डी कबड्डी कबड्डी’ को पहिलो गीत ‘दुबो फुल्यो’ सार्वजनिक भएको छ । एसडी योगीको संगीत रहेको गीतमा फिल्मका मुख्य कलाकार दयाहाङ राई, उपासना सिंह ठकुरी, कर्मा र विल्सनविक्रम राई फिचर्ड छन् । गीतमा हर्क साउदको शब्द र हेमन्त राना ऋतिका श्रेष्ठको स्वर छ । गीतको निर्देशन रेनशा वान्तवा राईले गरेकी हुन् । भने, कोरियोग्राफीको काम वाइल्ड रिपर्ज ग्रुपले सम्हालेको छ ।

फिल्ममा दयाहांग राई, उपासना सिंह ठकुरी र कर्मा मुख्य भूमिकामा रहेका छन् । साथै अन्य कलाकार रिश्मा गुरुङ, माओत्से गुरुङ, पुष्कर गुरुङ, कविता आले, विल्सन विक्रम राई, वुद्दि तामाङ, लुनिभा तुलाधर, बिजय बराल कमलमणि नेपाल, अरुणा कार्की, राजन खतिवडा, मणी के राई, डीबी गुरुङ, राजेन्द्र थापाको अभिनय छ । बासुरी फिल्मस् र सिनेमा आर्टको प्रस्तुतीमा तयार भएको फिल्ममा माउन्टेन स्टोरिज र नौमती इन्टरटेन्मेन्टको सहकार्य छ । फिल्ममा मणिराम पोखरेल, अर्जुन कार्की, ओम चन्द रौनियारको लगानी शैलेन्द्रध्वज कार्कीको छायांकन, निमेष श्रेष्ठको सम्पादन छ । रामबाबु गुरुङले निर्देशन गरेको फिल्म भदौ १३बाट प्रदर्शनमा आउने छ ।

सार्वजनिक गीतमा निर्माण पक्षले डान्स कभर कम्पिटिसन पनि आव्हान गरेको छ । गीतमा कभर भिडियो बनाएर प्रतिस्पर्धा जनाउने मध्येबाट उत्कृष्टलाई आकर्षक उपहार पनि तय गरिएको छ । इच्छुकले कभर भिडियो बनाएर ओएसआर डिजिटलको मेल आइडीमा पठाउनु पर्नेछ । विजेताको लागि निर्माण टिमले १ लाख रकम छुट्ट्याएको छ । भने, दोस्रोलाई ७५ हजार र तेस्रोलाई ५१ हजार नगद प्रदान गरिनेछ ।