‘प्रेम गीत ३’ मा शिव श्रेष्ठ र सुनिल थापा फाइनल, राजेश नहुने

फिल्म ‘प्रेम गीत ३’ का लागि अन्य २ कलाकार फाइनल भएका छन् । फिल्मका लागि प्रदीप खड्का ‘प्रेम’ र डेब्यु नायक मनिष राउतको बाबुको भूमिकामा शिव श्रेष्ठ फाइनल भएका छन् । अर्का मुख्य कलाकार सुनिल थापा समेत पक्का भएका छन् । फिल्मका लागि क्यारेक्टरको विषयमा कुरा भए संगै उनले स्क्रिप्ट पढेर काम गर्न तयार भएका हुन् । फिल्ममा बाबुको भूमिकामा राजेश हमाल हुने भनिए पनि २ महिना सम्म निर्माण टिमको समय लिएर अन्तत समय अभावको कारण जनाउदै उनले फिल्ममा जोडिन अस्विकार गरे । उनको स्थानमा शिव श्रेष्ठ राजा, बाबुको भूमिकामा देखिने छन् ।

यी कलाकारका अलावा फिल्ममा सन्तोष सेन, प्रेम पुरी र पुस्कर कार्की समेत यस अघि नै फाइनल भएका छन् । फिल्मका लागि फिमेल लिड क्यारेक्टर ‘गीत’ का लागि अडिसन भैरहेको छ ।  महिला कलाकारका लागि अडिसन भएको भने यो सिरिजमा पहिलो पटक हो ।  यस अघिका ‘गीत’ पूजा शर्मा र अश्र्लेशा ठकुरी अडिसन मार्फत छानिएर आएका होइनन् । तर पुरुष कलाकार प्रदीप खड्का र मनिष राउत भने अडिसन मार्फत नै फाइनल भएका हुन् ।

आसुसेन फिल्म्स प्रोडक्सनको ब्यानरमा निर्माता सन्तोष सेन र छेतेन गुरुङले एक साथ यो फिल्म निर्देशन गर्न लागेका छन् । चंखे शंखे पंखे, प्रेम गीत, प्रेम गीत २, मेरी मामु पछिको निर्माता सेनको यो पाँचौं प्रोजेक्ट हो । प्रेम गीतको तेस्रो सिरिज यो बर्षको अन्तिम ‘चैत २८’ मा देशभर पर्दशनमा आउने छ ।