आमेशको बिहेमा नाचे अनमोल, सुहानासंगै सलोन

चैत्र २९ गते देखि प्रदर्शनमा आउन लागेको बहुप्रतिक्षित फिल्म ‘ए मेरो हजुर ३’ मा समावेश दोश्रो गीत सार्वजनिक भएको छ । आनन्द अधिकारीको शब्दमा आशिष अविरलको संगीत रहेको ‘परान’ बोलको सार्वजनिक लोक फ्लेभरको गीतमा आशिष अविरलसंगै अन्जु पन्तको स्वर रहेको छ ।

विवाहको परिवेश बनाएर प्रविन सिंहको कोरियोग्राफीमा निर्माण गरिएको सार्वाजनिक गीतको भिडियोमा नायक आमेश भण्डारी बेहुला बनेका छन् भने उनकै विवाह समारोहमा अनमोल सुहानासंगै सलोन नाचेका छन् । सुहाना इन्टरटेनमेन्टको ब्यानरमा सुनिल कुमार थापाको निर्माण रहेको फिल्मलाई नायिका तथा निर्देशक झरना थापाले निर्देशन गरेकी हुन् ।

फिल्ममा अनमोल सुहाना र सलोनसंगै रविन्द्र झा, रुपा घिसिङ, रक्षा गौतम, बिशाल पहाडी, रेअर राई, सरोज खनाल लगायतको मुख्य भूमिका रहेको छ । फिल्ममा कथा निर्देशक झरना थापासंगै सुमन पौडेलको रहेको छ भने पटकथा तथा संवाद छेतन गुरुङ, बाबुराम दाहाल, सुमन पौडेल र प्रतिक पौडेलको रहेको छ । फिल्ममा आशिष अविरल, कल्याण सिंह, कोशिश क्षेत्री, पुष्पन प्रधान लगायतको संगीत समावेश छ ।

फिल्ममा कविराज गहतराज, रामजी लामिछाने, प्रविन सिंह, राहुल शाहको कोरियोग्राफी, दिर्घ खड्काको सम्पादन, हिमाल केसीको द्वन्द तथा संजय लामा, सुदिप बराल र शम्भु मोक्तानको छायाँकन रहेको छ । फिल्मलाई उपत्यका भित्र गोविन्द शाही र उपत्यका बाहिर मनोज राठी र उज्ज्वल पौडेलले वितरण गर्दै छन् ।