रेखा थापाले किनिन् महिला क्रिकेट टिम

कलाकार रेखा थापाले ‘एनसिएल टि-२० वुमन्स लिग’ का लागि क्रिकेट टिम खरिद गरेकी छन् । उनले यस प्रतियोगिताका लागि ‘काठमाडौं सुपर च्याम्पियन्स’ टिम किनेकी हुन् ।

राजधानीमा आयोजित पत्रकार सम्मेलनमा ‘एनसिएल टि-२० वुमन्स लिग’ को लागि सहभागी टिम, मालिक र मार्की खेलाडीको घोषणा गरिएको छ । रेखाले महिला क्रिकेट टिममा योगदान दिने उद्देश्यले आयोजकले ल्याएको प्रस्ताव स्वीकार गरेको बताइन् । टिमको मार्की खेलाडीको रुपमा नेरी थापा छिन् ।

वैशाख ७ देखी १४ गतेसम्म विराटनगरस्थित बैजनाथपुर क्रिकेट मैदानमा हुने ‘एनसिएल वुमन्स टि-२०’ विजेता टोलीले ट्रफीसहित १० लाख रुपैयाँ र उप-विजेताले ५ लाख रुपैयाँ प्राप्त गर्नेछ । हरेक खेलको ‘प्लयेर अफ द म्याच’ ले १० हजार रुपैयाँ प्राप्त गर्नेछन् ।