‘जानी नजानी’ लाई लिएर विस्वस्त मनिष

चैत १ गते देखि ३ फिल्म रिलिजको क्रममा छन् । त्यस मध्ये जानी नजानी पनि एक हो । प्रेम र जीवनको सौन्दर्य साथै प्रेमको शक्तिले मानिसलाई सफलतातर्फ डोहोर्याएको कथालाई समेटेर निर्देशक बसन्त अधिकारीले फिल्म तयार पारेका छन् । फिल्ममा मनिष श्रेष्ठ, निरिषा बस्नेत, सन्नी सिंह, नम्रता श्रेष्ठ, प्रकाश अधिकारी, कृष्णभक्त महर्जन, रोशनी केसीको मुख्य भूमिका छ ।

चिन्तन,साधना र लेखनमा क्रियासिल पुराना पत्रकार मोदनाथ खनालको मुख्य लगानी रहेको फिल्म रोशनी इन्टरटेन्मेनटको ब्यानरमा निर्माण गरिएको हो । यसमा सागर काजी मालीले पनि निर्माणमा सहयोग गरेका छन् । फिल्मको कथा, पटकथा तथा संवाद सामिप्यराज तिमिल्सेनाले लेखेका हुन् । संगीत अर्जुन पोखरेलले दिएका छन् भने सञ्जय लामाको छायाँकन, कविराज गहतराज, प्रविन सिंह र शिशिर खातीको कोरियोग्राफी तथा अर्जुन जिसीको सम्पादन रहेको छ ।

फिल्ममा जिम्मेवारीबाट पन्छिएको एक धनाढ्य बाबुको छोरालाई यूवतीले कसरी जिम्मेवारी बहन गर्न सिकाउँछिन् भन्ने देखाइएको छ । फिल्ममा पहिलो पटक लगानी गरेका मोदनाथ खनाल यसबाट आफूले सफलता प्राप्त गर्नेमा विश्वस्त छन् । मान्छेको जीवन नै नजानीकन सुरु हुने भएकाले नजानीकन नै लगानी गरेर सफलता पाउने उनको दाबी छ ।

फरक कथाबस्तु भएकाले दर्शकले रुचाइदिनेमा खनाल आशावादी छन् । प्रेम र जीवनको सौन्दर्यलाई फिल्मले मजाले उठान गरेकाले प्रेमबाट उर्जा साथै सिर्जना मिल्ने भएकाले दर्शकहरुका लागि नयाँ स्वाद हुनसक्ने उनको भनाइ छ । नायक मनिष श्रेष्ठ भने यो फिल्मबाट निकै नै आशावादी छन् । यो फिल्ममा आफूले गरेको मिहिनेतबाट उनी विश्वस्त पनि देखिएका छन् ।

फिल्मको लागि मनिषले डान्स क्लास पनि लिएका थिए र एक्टिङ पनि । यती धेरै मेहेनतको कारणले होला उनी फिल्म जानी नजानीलाई लिएर विश्वस्त छन् ।