‘बाबरी’को टिजरमा बदलिएको धिरजको स्वर

३ बर्ष भन्दा लामो समयपछि आजबाट हलमा ‘कबड्डी ४’ हेर्न पुगेका दर्शकले नायक धिरज मगरको झलक देख्न पाउनेछन् । आजबाट रिलिज भएको फिल्मसँगै भदौ ३१ गतेबाट रिलिज हुन लागेको फिल्म ‘बाबरी’को टिजर पनि जोडिएको छ ।

सुरेन्द्र पौडेलको निर्देशनमा तयार भएको यो फिल्ममा नायक धिरज मगर र नायिका अदिती वुढाथोकीलाई देख्न सकिन्छ । टिजर हलमा हेरेका अधिकांश दर्शकलाई लाग्न सक्छ कि, के नायक धिरज मगरले डबिङ आफै गरेका हुन् ? कारण, धिरजको स्वरमा पुरै परिवर्तन देखिएको छ ।

निर्देशक पौडेलले भने धिरजले नै डबिङ गरेको बताए । धिरजको परिवर्तित स्वरले दर्शकलाई सरप्राइज दिन सक्छ । नायिका अदिती वुढाथोकी यसअगाडिको फिल्म ‘कृ’मा जस्तै यसमा पनि साधारण यूवतीको भूमिकामा छिन् । हलमा सार्वजनिक गरिएको टिजरले दर्शकमा कौतुहलता प्रदान गर्ने निश्चित छ ।